પૂર્વ ભારતીય ક્રિકેટર રોબિન ઉથપ્પા વિરૂદ્ધ ધરપકડ વોરંટ ઇસ્યુ થયું

પૂર્વ ભારતીય ક્રિકેટર રોબિન ઉથપ્પા વિરૂદ્ધ ધરપકડ વોરંટ ઇસ્યુ થયું

Blog Article

ભારતીય ક્રિકેટ ટીમના ભૂતપૂર્વ ખેલાડી રોબિન ઉથપ્પા વિરુદ્ધ છેતરપિંડીનો કેસ બહાર આવ્યો છે. તેના પર રૂ. 23 લાખની ઉચાપતનો આરોપ છે. આ કેસમાં તેની સામે ધરપકડ વોરંટ ઇસ્યુ કરવામાં આવ્યું છે. જોકે, પોલીસ હજુ સુધી ઉથપ્પાનું ચોક્કસ સરનામું શોધી શકી નથી તેવું કહેવાય છે. ઉથપ્પા સામેનું વોરંટ પ્રોવિડન્ટ ફંડ કેસમાં તેમના પર લાગેલા આરોપો માટે ઇસ્યુ કરવામાં આવ્યું છે. આંધ્રના પ્રાદેશિક પીએફ કમિશનર એસ. ગોપાલ રેડ્ડીએ વોરંટ ઇસ્યુ કર્યું છે, જેમણે પુલકેશનગર પોલીસને તાત્કાલિક પગલાં લેવા જણાવ્યું છે.
ઉથપ્પા સેન્ચ્યુરીઝ લાઇફસ્ટાઇલ બ્રાન્ડ્સ પ્રાઇવેટ લિમિટેડ કંપનીનું સંચાલન કરે છે. તેના પર કર્મચારીઓના પગારમાંથી પીએફના પૈસા કાપીને તેને પીએફ ખાતામાં જમા ન કરવાનો આરોપ છે. આ કેસની કુલ કિંમત 23 લાખ રૂપિયા છે. 4 ડિસેમ્બરે કમિશનર રેડ્ડીએ પોલીસને ઉથપ્પા વિરુદ્ધ વોરંટ જારી કરવા કહ્યું, પરંતુ તે પોલીસ પાસે પાછું આવ્યું કારણ કે ઉથપ્પાએ તેનું સરનામું બદલી નાખ્યું હતું. અધિકારીઓ હવે તેનું નવું સરનામું શોધવાનો પ્રયાસ કરી રહ્યા છે. નિયમો અનુસાર, કોઈપણ કંપની જે તેના કર્મચારીઓના પીએફ પેટે જે રકમ કાપે છે તેણે તે રકમ તેમના પીએફ ખાતામાં જમા કરાવવું પડે છે. જો આમ ન થાય તો તેને કાયદાનું ઉલ્લંઘન અને પૈસાનો દુરુપયોગ ગણવામાં આવે છે.
ઉથપ્પાએ આઈપીએલમાં કોલકાતા નાઈટ રાઈડર્સ અને ચેન્નાઈ સુપર કિંગ્સ માટે તોફાની બેટિંગ કરી હતી. સપ્ટેમ્બર 2022માં તેણે આંતરરાષ્ટ્રીય ક્રિકેટમાંથી નિવૃત્તિ લીધી હતી.